طبعن الطلاب يتقسمو 4 أقسام … حسب مستوى الإنجليزي والرياضيات :
Ch : مستوى عالي في الرياضيات والإنجليزي …
cr : مستوى عالي في الإنجليزي فقط …
br : مستوى جيد في الإنجليزي …
ar : مستوى متدني في الإنجليزي …
كل صنف يدرس لحالو … باستثناء طلاب الـc يدرسو مع بعض … وفي الترم الأخير يدرسو كلهم سوا عادي …
السنة في الـcpc تتكون من 3 أترام …!
في أول ترمين ونص يتم تهييئك لاختبار اسمو ap … وهوا اختبار عالمي تختبرو في الرياضيات والكيميا أو الرياضيات والفيزيا أو اقتصاد ورياضيات حسب تخصصك … الاختبار متوسط المستوى … لكنو أسهل بكتييييييير من أسئلة مدرسين الـcpc…
بالنسبة للدراسة … جدا جدا جدا صعبة … وكرف وضغط وإرهاق … ومافي وقت … يعني ترجع وعندك ستة آلاف شي تبغى تسويه … ما تقدر تسويها كلها أحياناً …
الدراسة تبدأ من 7 ونص صباحاً لكل الطلاب … النهاية تختلف من طالب لطالب حسب تخصصك ومستواك … في الترم الأول كانو كل الطلاب عندهم يوم على الأقل يخلصو الساعة 5 العصر … وتقل تدريجياً إلين الترم الاخير تخلص كل يوم 3 العصر …
ترتيب الحصص … حصة … بريك 10 دقايق … حصة … بريك نص ساعة … حصة … بريك 10 دقايق … حصة … بريك الغدا ( 80 دقيقة ) … حصة … بريك 10 دقايق … حصة … بريك العصر ( 20 دقيقة ) … حصة … بريك 10 دقايق … حصة …
طبعن دا لو كنت تخرج الساعة 5 … بس لو بدري عد كم حصة … كل الحصص تبدأ في نفس الوقت وتنتهي في نفس الوقت …
في كل ترم … عندك حد أقصى للغيابات … في الترم الأول 24 … والتاني 24 … والتالت 30 …
الترم التالت أطول ترم ( 4 شهور وزيادة ) …!
ينقسم الترم التالت قسمين … قبل اختبار الـap … وبعد الاختبار … طبعن بعد الاختبار يتغير الجدول …
لما تستلم الجدول … كل حصة في فصل مختلف … يعني تتنقل زي الجامعة … وطلاب مختلفين أحياناً …
المدرسين محترفين … أغلبهم دكاترة … مستوا تعليمي عالي جداً … أسئلة اختبارات بنت حرام … صعبة جدا جدا جدا … الفل مارك مستحييييييلة … حتتعود على الرسوب ( أقل من 50 ) … بس شد حيلك …
المدرسين مشددين جدا على مسألة الوقت … تتأخر 15 ثانية تحسب غايب وما تدخل الفصل … بس بعضهم ( قليييل جدا ) يتساهل شويتين …
في سناك بار ( مقصف ) جنب مبنى الدراسة … جيد … بس زححححمة وقت الفطور … افطر بدري عشان تفطر على رواقة …
أرامكو توفرلك كل اللى تحتاجو للجامعة … اختبار sat ( زي اختبار القدرات عندنا ) … واختبارات التوفل والآيلتس … وكلها في نفس المبنى … يجيبو الفريق كامل يختبرك في نفس المبنى … الفلوووس تسوي كل شي …
بعض الاحيان تجبر إنك تداوم يوم الخميس … سواء اختبار أو تقوية ( إجباري ) …
طول فترة الدراسة … معدلك لازم ما يقل عن 2.5 من 4 …
على مر الدهور والعصور والأزمان … مافي أحد وصل 3.9 …
أرامكو عندها قائمة معينة للجامعات حسب التخصص … ولما يجي وقت التقديم ع الجامعات … تختار 5 جامعات من القائمة … وتقدم عليها … تدفع الفلوس من عندك وبعدين يرجعولك هيا … ولما يجيك القبول تقولهم فين تبغا تروح وهما يتفاهمو مع الجامعة …
لما تكون هنا في الظهران تستلم 3000 ريال شهريا ( بالتقويم الميلادي ) … تكفي وزيادة …
وبعدين تزيد كل سنة إلين توصل آخر سنة 4500 راتب أساسي مع بدل دراسة خارج الممملكة … يوصل راتبك 9000 ريال في آخر سنة …
لما تجي تروح الجامعة … يدوك فلوس تشتري لابتوب … وكل ترم يدوك فلوس تشتري كتب … ويدوك زيادة لما تطلع الدرجات حسب معدلك …
الشركة توفرلك رحلات مجانية لجدة على طياراتها … وكمان تخفيض 50٪ على طيارات الخطوط زي المدارس والجامعات .
المدرسين أمريكان وبريطانيين وفلبينيين وأردنيين وسوريين ولبنانيين … الدراسة كلها بالإنجليزي …
كل أسبوع تنزل المختبر … تسوي تجارب وبعدين تكتب تقرير عن التجربة …
بعض المدرسين فلة … وبعضهم بييييض … وبعضهم بس حق دراسة … وبعضهم أنجااااس … ولازم تعرف تتعامل مع كل نوع …
لو قدر الله وانقبلت … خلي في بالك إنو حتجي إجازات طلاب المدارس والجامعات ونتا عندك دراسة …
إجازات أرامكو قليييييييييييييييلة …
لو نزل معدلك عن المطلوب تاخد تنبيه … ولو أتكرر تنطرد …
لو انسحبت من البرنامج ( فيه فرق بين الانسحاب والطرد ) ما تقدر ترجع للشركة إطلاقاً … حتى لو درست وخلصت ما تقدر تقدم على الشركة …
أغلبنا كان الأفضل في مدرستو … لكن الوضع هنا مختلف تماماً … حتشوف نفسك بين دوافيييييييير … ناس ما ترحم …
أخيرن … للي محتار بين أرامكو وسابك … حأقولكم بعض الفروقات الى أعرفها من طلاب قدي في بعثة سابك أعرفهم معرفة شخصية …
البرنامج التحضيري لسابك في أمريكا … بس إنجليزي …
البرنامج التحضيري لأرامكو في الظهران … دراسة كاااملة ( إنجليزي رياضيات كيميا و فيزيا وكمبيوتر وبدنية وبرمجة وبحث و… ) …
أرامكو تهتم بيك لدرجة إنك لو ما عديت اختبار عالمي يعيدوه ليك إلين تعديه على حسابهم …
سابك يرسلو للطلاب رسالة ع الإيميل ( يفضل إنك تختبر الاختبار الفلاني عشانو مطلوب في الجامعات ) وعلى حسابك .!!
أرامكو تحسبها ليك سنوات خدمة …
سابك ما تحسبها خدمة … ( معلومة أكيدة ومضمونة و موثوقة جداً ) …
أرامكو توفرلك خدمات حتى وإنتا في أمريكا … من ضمنها إنها توفرلك اتصالاتك للسعودية مجاناً …
سابك … مع نفسك …
أرامكو أكبر شركة بترول في العالم …
سابك … طوووووط …
وقت التسجيل … سابك عندهم سؤال في الفورم حق التقديم ( هل أحد أقاربك يشتغل في سابك ؟؟ ) … يلعن أم الواسطاات …
أعرف طلاب طلعو مع سابك بدون اختبار ولا مقابلة ولا أي شي … كلو واسطاااات …
أرامكو توفرلك اختبار الـ ap اللي يخليك تجتاز أول مستويين في الكيميا والفيزيا والرياضيات حسب درجتك …!
وبالنسبة لبعض الناس اللى يقولك مكافأة التقاعد في سابك أعلى … أقولو حبيبي … في أرامكو … شي بديهي إنو راتبك أعلى من 30 ألف بحكم إنك مهندس … وفي سابك … سلملي على سلم الرواتب …
من وجهة نظري … مافي مقارنة …
وبالنسبة لقائمة الجامعات … من أقوى جامعات العالم …
على فكرة … إدارة الطيران تجيك في نص السنة تقدم عروض لبعض الطلاب إنهم يدرسو تخصصهم مع دراسة الطيران … ويرجع طيار ومهندس … أم الفلة …
دا اللى عندي … ومعليش لو نسيت شي …
وأستقبل استفساراتكم بكل أريحية …
ومعليش ع الإطالة …
وشكراً …
